- Auglýsing -
- Steinunn Hansdóttir skoraði tvö mörk þegar lið hennar, Skanderborg Håndbold, tapaði með 18 marka mun, 36:17, fyrir Herning-Ikast á heimavelli síðarnefnda liðsins í gærkvöld. Skanderborg Håndbold á einn leik eftir í dönsku úrvalsdeildinni og er fyrir hann í 12. sæti af 14 liðum með 13 stig.
- Elsa Karen Þorvalsdóttir Sæmundsen hefur endurnýjað samning sinn við Fjölni/Fylki sem leikur í Grill66-deildinni. Elsa Karen er línumaður og er uppalin hjá Fylki og lék upp yngri flokka félagsins. Hún hefur verið fastamaður í meistaraflokki um árabil eftir því sem segir í tilkynningu frá Fjölni/Fylki.
- Viðureign Íslandsmeistara KA/Þórs og Hauka í Olísdeild kvenna sem fram átti að fara í KA-heimilinu í dag var frestað til morgundagsins. Vegna veðurs og ófærðar þá fóru þrír dagar í ferð KA/Þórsliðsins vegna leiks við ÍBV á fimmtudagskvöld. Liðið kom ekki til Akureyrar fyrr en nokkuð var liðið á gærdaginn.
- Birna Berg Haraldsdóttir var á leikskýrslu og tók eitt vítakast fyrir ÍBV þegar liðið vann KA/Þór í fyrrakvöld. Ekki er liðið hálft ár síðan Birna Berg fór í aðgerð á hné vegna krossbandaslits. Hún er þó ekki talin líkleg til þess að taka þátt í kappleikjum af alvöru á næstunni en ljóst er þó að bati hennar hefur verið góður sem er gleðilegt. Birnu brást bogalistin í vítakastinu. Matea Lonac markvörður sá við örvhentu stórskyttunni í vítakastinu.
- Auglýsing -
