- Auglýsing -
- Tomas Svensson, fyrrverandi markvarðaþjálfari íslenska karlalandsliðsins, hefur látið af störfum hjá SC Magdeburg eftir sjö ár sem markvarðaþjálfari félagsins. Ekki kemur fram í tilkynningu SC Magdeburg í gær hvað Svensson tekur sér fyrir hendur. Á vordögum var hann orðaður við starf hjá Barcelona.
- Greint var frá því í gær á vef Mundo Deportivo að örvhenti hornamaðurinn Mamadou Diocou verði lánaður frá Barcelona til Rhein-Neckar Löwen á næstu leiktíð. Diocou, sem er 21 árs gamall, var þriðji hægri hornamaður Barcelona á síðustu leiktíð. Hann vill gjarnan fá fleiri tækifæri til að láta ljós sitt skína.
- Svenski hornamaðurinn Hampus Wanne mun vera undir smásjá Barcelona um þessar mundir eftir því sem fjölmiðlar á Spáni greina frá. Wanne fór á kostum með Flensburg á síðustu leiktíð og skoraði 230 mörk í leikjum þýsku 1. deildarinnar. Einnig lék Wanne afbragðsvel á heimsmeistaramótinu í Egyptalandi í janúar. Hann á ár eftir ólokið af samningi sínum við Flensburg.
- Þjóðverjar eru skipulagðir eins og margir vita. Stjórnendur þýska liðsins Flensburg eru þar engin undantekning. Þeir greindu frá því í gær að Holger Glandorf, fyrrverandi landsliðsmaður og leikmaður félagsins, taki við sem framkvæmdastjóri 1. júlí 2022. Hann leysir þá af Dierk Schmäschke sem hefur haldið um stjórntaumana síðustu 17 ár.
- Auglýsing -
