- Auglýsing -
- Tryggvi Þórisson skoraði eitt mark fyrir Sävehof þegar liðið vann stórsigur á HK Malmö, 32:24, en leikið var í Malmö. Simon Möller markvörður Sävehof átti stórleik, varði 22 skot, 50%. Sävehof komst í efsta sæti sænsku úrvalsdeildarinnar með sigrinum. Liðið er stigi fyrir ofan Skövde og þremur stigum ofar en Hammarby. Stöðuna í sænsku úrvalsdeildinni og í fleiri deildum í Evrópu er að finna hér.
- Sterkur orðrómur er uppi um að sænski handknattleiksmaðurinn Jim Gottfridsson gangi til liðs við ungverska liðið Pick Szeged í sumar þar sem landi hans Michael Apelgren tekur við þjálfarastöðunni. Gottfridsson er samningsbundinn Flensburg til ársins 2025 en það fylgir sögunni að ungverska liðið sé tilbúið að kaupa upp samning Gottfridsson við Flensburg til þess að tryggja sér starfskrafta Svíans strax á næstu leiktíð. Gottfridsson hefur verið hjá Flensburg í áratug.
- Holger Glandorf framkvæmdastjóri Flensburg sagði í gær að Gottfridsson sé með samning við félagið fram á mitt ár 2025. Ekki standi til að breyting verði á.
- Sænski landsliðsmarkvörðurinn Tobias Thulin hefur samið við ungverska liðið Pick Szeged frá og með næsta sumri. Thulin leikur núna með GOG í Danmörku, tók við markvarðastöðunni þegar Viktor Gísli Hallgrímsson flutti sig um set, frá GOG til Nantes, sumarið 2022. Samningur Thulin við Pick Szeged er til þriggja ára.
- Hollenski landsliðsmaðurinn, Kay Smits, leikur ekki með landsliði sínu á EM í næsta mánuði vegna veikinda sem tengist hjarta. Eins mun hann ekki leika fleiri leiki með Flensburg um ótiltekinn tíma eftir því sem fram kemur hjá forráðamönnum félagsins.
- Smits, sem er 26 ára gamall, kom til Flensburg í sumar eftir að hafa orðið Evrópumeistari með SC Magdeburg á síðustu leiktíð og m.a.hlaupið í skarðið fyrir Ómar Inga Magnússon þegar hann var meiddur fyrri hluta ársins.
- Smits er undir stöðugu eftirliti lækna. Hann lék síðast með Flensburg gegn Wetzlar fyrir rúmri viku.