- Auglýsing -
- Landsliðsmaður Færeyinga, Isak Vedelsbøl, gengur til liðs við danska úrvalsdeildarliðið HØJ í sumar eftir tveggja ára veru hjá IK Sävehof. Vedelsbøl er mikið efni. Hann er ekki aðeins öflugur línumaður heldur afar lofandi varnarmaður. Vedelsbøl verður með færeyska landsliðinu á EM í næsta mánuði. Vedelsbøl var einn leikmanna 21 árs landsliðs Færeyinga sem vann bronsverðlaun á HM 21 árs landsliða í Póllandi í júní.
- Forsvarsmaður pólska liðsins Industria Kielce segir að félagið hafi í hyggju að halda þjálfaranum Talant Dujshebaev hvað sem öllum tíðindum af líður af hugsanlegum breytingum. Bæði félagið og Dujshebaev hafa áhuga á að halda samstarfinu áfram. Dujshebaev hefur þjálfað liðið frá 2014 og m.a. fært því sigur í Meistaradeild Evrópu.
- Fram undan er uppbyggingartími hjá Industria Kielce eftir tvö mögur keppnistímabil í kjölfar sparnaðar vegna breytinga í hópi styrktarfyrirtækja. Eins og lesendur handbolti.is muna eflaust var félagið nærri gjaldþroti fyrir um tveimur árum.
- Nú skal blásið til sóknar á nýjan leik og hrint velti Wisla Plock sem unnið hefur pólska meistaratitilinn tvö undangengin ár.
- Tvö öflugustu kvennalið danska handknattleiksins, Odense Håndbold og Team Esbjerg, mætast í kvöld í úrslitaleik bikarkeppninnar. Odsene vann Ikast, 38:27, í undanúrslitum í gær. Esbjerg lagði Viborg, 39:28. Úrslitaleikurinn fer fram í Jyske Bank Arena Fyn í Óðinsvéum.
- Danska landsliðskonan, Trine Østergaard, flytur heim frá Rúmeníu næsta sumar og gengur til liðs við Viborg. Østergaard, sem leikur í hægra horni, hefur undanfarin ár leikið með CSM Búkarest.
- Auglýsing -
