- Auglýsing -
- Viktor Gísli Hallgrímsson og félagar í HBC Nantes tryggðu sér sæti í átta liða úrslitum frönsku bikarkeppninnar í gærkvöld með stórsigri á US Créteil, 38:23, á útivelli. Viktor Gísli var í marki Nantes frá upphafi til enda. Hann varði 11 skot, 33%.
- Arnar Freyr Arnarsson var í liði 16. umferðar þýsku 1. deildarinnar í handknattleik sem kynnt var til sögunnar á mánudaginn í framhaldi af því að síðustu leikirnir fór fram á sunnudaginn. Arnar Freyr lék afar vel með MT Melsungen þegar liðið gerði jafntefli við SC Magdeburg, 29:29, á heimavelli. Arnar Freyr skoraði fimm mörk í fimm skotum, m.a. jöfnunarmetið, 29:29. Þetta er alltént í fyrsta sinn á keppnistímabilinu sem Arnar Freyr er í liði umferðarinnar.
- Ágúst Elí Björgvinsson varði 6 skot, 33,3% þann tíma sem hann stóð í marki Ribe-Esbjerg í gærkvöld þegar liðið tapaði naumlega í heimsókn til Skanderborg AGF, 27:26, í dönsku úrvalsdeildinni í handknattleik í gær. Elvar Ásgeirsson skoraði tvö mörk fyrir Ribe-Esbjerg, átti þrjár stoðsendingar og var einu sinni vikið af leikvelli. Ribe-Esbjerg, sem vann efsta liðið, Aalborg um síðustu helgi situr í fjórða sæti með 20 stig eftir 17 leiki eins og m.a. má hér.
- Eftir fjóra sigurleiki í röð í dönsku úrvalsdeildinni gerðu Guðmundur Þórður Guðmundsson og liðsmenn Fredericia jafntefli á heimavelli við Mors-Thy, 25:25, í hörkuleik. Einar Þorsteinn Ólafsson var einu sinni vikið af leikvelli í liði Fredericia sem er í öðru sæti deildarinnar, eins og sjá m.a. hér.
- Halldór Jóhann Sigfússon og liðsmenn Nordsjælland töpuðu fyrir Skjern, 28:26, á heimavelli í 17. umferð dönsku úrvalsdeildarinnar í gær og eru í næst neðsta sæti með 10 stig.
- Stöðuna í dönsku úrvalsdeildinni er að finna hér ásamt stöðunum í fleiri deildum í evrópskum handbolta.
- Sveinn Jóhannsson skoraði fjögur mörk fyrir GWD Minden í fyrrakvöld þegar liðið tapaði fyrir Dormagen, 24:18, í þýsku 2. deildinni í handknattleik. Bjarni Ófeigur Valdimarsson náði sér ekki á strik, skoraði ekki mark úr sjö tilraunum. Hann átti þrjár stoðsendingar. Aðalsteinn Eyjólfsson er þjálfari GWD Minden sem situr í 14. sæti af 18 liðum deildarinnar. Minden féll úr 1. deild í vor. Ljóst er að betur má ef duga skal í 2. deild.
- Harpa Rut Jónsdóttir skoraði eitt mark í sigri GC Amicitia Zürich á LK Zug, 38:31, í svissnesku A-deildinni í handknattleik í gær. Leikurinn fór fram í Zürich. GC Amicitia Zürich situr í 5. sæti af 8 liðum deildarinnar með 10 stig eftir 10 leiki.
- Auglýsing -
