Viktor Gísli Hallgrímsson og Aron Pálmarsson. Mynd/Hafliði Breiðfjörð
- Auglýsing -
Viktor Gísli Hallgrímsson varði 12 skot, 48%, þann tíma sem hann stóð á milli stanganna í marki Nantes í gær í sjö marka sigri á Sélestat í frönsku 1. deildinni í handknattleik í gær, 31:24. Grétar Ari Guðjónsson varði sex skot, 40%, þann skamma tíma sem hann fékk til að sanna sig í marki Sélestat.
Nantes er í þriðja sæti deildarinnar með 20 stig eftir 12 leiki, tveimur stigum á eftir PSG og Montpellier. Nýliðar Sélestat er neðstir án stiga.
Aron Pálmarsson lék afar vel með Aalborg Håndbold í gær þegar liðið vann Lemvig, 36:29, í dönsku úrvalsdeildinni í handknattleik karla. Aron skoraði þrjú mörk og átti sex stoðsendingar á samherja sína. Sebastian Barthold skoraði sex mörk og var markahæstur leikmanna Aalborg Håndbold. Arnór Atlason er sem fyrr aðstoðarþjálfari Aalborg sem er í öðru sæti dönsku úrvalsdeildarinnar með 27 stig eftir 16 leiki, er tveimur stigum á eftir GOG.
Daníel Freyr Andrésson stóð í marki Lemvig hluta leiksins og varði 4 skot, 22%. Vilhelm Poulsen fyrrverandi leikmaður Fram skoraði eitt mark og gaf tvær stoðsendingar fyrir lið Lemvig sem er í 11. sæti úrvalsdeildarinnar með 8 stig eftir 16 leiki. Alls eru 14 lið í dönsku úrvalsdeildinni.
Áfram syrtir í álinn hjá Erni Vésteinssyni Östenberg og félögum í Haslum HK í norsku úrvalsdeildinni í handknattleik. Í gær tapaði Haslum fyrir Kristiansand Topphåndball, 40:32, á heimavelli. Örn skoraði eitt mark. Haslum rekur lestina í deildinni.
Harpa Rut Jónsdóttir var ekki á meðal markskorara GC Amicitia Zürich þegar liðið vann eins marks sigur á SPONO Eagles, 28:27, á útvelli í svissnesku A-deildinni í gærkvöld. Leikið var á heimavelli SPONO sem er í efsta sæti deildarinnar en þetta var fyrsta tap liðsins. GC Amicitia Zürich er í fjórða sæti með átta stig eftir átta leiki. Sunna Guðrún Pétursdóttir var ekki í leikmannahópi GC Amicitia Zürich vegna meiðsla.
Kristján Örn Kristjánsson, Donni, var í leikmannahópi PAUC í fyrrakvöld þegar liðið vann Cesson Rennes, 28:25, á útivelli í frönsku 1. deildinni í handknattleik. Donni lék ekkert með enda nýlega stiginn upp úr erfiðum ökklameiðslum auk þess sem framundan er erfiður leikur hjá PAUC við Ystads í fimmtu umferð Evrópudeildarinnarinnar annað kvöld.
Ásgeir Snær Vignisson átti stórleik og skoraði sjö mörk fyrir Helsingborg þegar liðið vann IFK Skövde með fimm marka mun, 30:25, í sænsku úrvalsdeildinni í handknattleik í fyrradag. Leikurinn fór fram í Skövde. Bjarni Ófeigur Valdimarsson skoraði þrjú mörk fyrir Skövde sem situr í sjötta sæti deildarinnar með 13 stig eftir 14 leiki. Helsingborg rauk upp í níunda sæti úr því þrettánda með sigrinum.
Tryggvi Þórisson og félagar í Sävehof unnu Guif, 35:29, í sænsku úrvalsdeildinni í handknattleik karla í fyrradag. Tryggvi skoraði ekki mark í leiknum. Sävehof er í öðru sæti deildarinnar með 23 stig eftir 14 leiki, er fjórum stigum á eftir IFK Kristianstad sem hefur unnið 13 af 14 leikjum sínum í deildinni til þessa og gert eitt jafntefli.
