FH vann Hauka í hörkuleik Kaplakrika í Hafnarfirði í gærkvöld, 27:26, í upphafsleik 6. umferðar Olísdeildar karla. Birgir Már Birgisson skoraði sigurmarkið 45 sekúndum fyrir leikslok. Haukar áttu síðustu sóknina og Andri Már Rúnarsson síðasta markskotið sem Phil Döhler markvörður FH sá við.
Með sigrinum komst FH upp í fjórða sæti deildarinnar með sex stig eftir sex leiki. Þetta var annar sigur FH-inga í röð. Virðast þeir vera að rétta úr kútnum eftir erfiða byrjun.
Haukar eru stigi á eftir FH með fimm stig. Staðan í Olísdeildinn er hér en hún mun örugglega stokkast upp eftir þrjár viðureignir kvöldsins. Dagskrá kvöldsins er að finna hér.
Jói Long lætur sig sjaldan vanta á leiki karlaliðs FH og aldrei er myndavélin langt undan. Hann deildi myndum frá leik gærkvöldsins með handbolta.is. Þökkum við honum kærlega fyrir. Hluta myndanna er að finna hér fyrir neðan.
