Myndir: Fyrsta æfing í Búdapest er að baki

Íslenska landsliðið í handknattleik karla æfði í fyrsta sinn í morgun eftir að það kom til Búdapest í Ungverjalandi í gær. Æfingin fór fram í Vasas SC æfingahöll B-riðils en ekki í keppnishöllinni þar sem leikir liðsins fara fram. Eftir því sem næst verður komist stendur til að æfa í keppnishöllinni á morgun, daginn fyrir fyrsta leikinn í mótinu.

Allir leikmenn hópsins tóku þátt í æfingunni í morgun og eftir því sem fram kemur í tilkynningu HSÍ var góð stemning í hópnum.

Fyrsti leikur liðsins á EM fer fram á föstudaginn gegn Portúgal og verður flautað til leiks klukkan 19.30.

Vegna sóttvarnarreglna var æfingin ekki opin fjölmiðlum. Myndirnar fyrir neðan voru teknar af starfsmanni Handknattleikssambandsins, Kjartani Vídó Ólafssyni.