Íslenska landsliðið í handknattleik karla, skipað leikmönnum 21 árs og yngri æfði í 50 mínútur í Max Schmeling-Halle í Berlín í dag. Allir leikmenn liðsins, 17 að tölu, tóku þátt í æfingunni virtust allir vera hressir og kátir og tilbúnir í átökin á morgun gegn Portúgal í átta liða úrslitum heimsmeistaramótsins.
Flautað verður til leiks klukkan 13.45. Sigurliðið tekur sæti í undanúrslitum sem fram fara á laugardaginn. Tapliðið leikur í krossspili um fimmta til áttunda sætið sama dag.
Gríðarlegur áhugi er fyrir leikjunum í Berlín. Eftir því sem næst verður komist verður sennilega uppselt á undanúrslita- og úrslitaleikina á laugardag og á sunnudag.
Max Schmeling-Halle er glæsilegt mannvirki sem rúmar hátt í 10 þúsund áhorfendur í sæti og er heimavöllur þýska liðsins Füchse Berlin sem vann Evrópudeildina í handknattleik karla í vor. Hægt er að stunda fleiri íþróttagreinar í höllinni.
Handbolti.is brá undir sig betri fætinum árla morguns og fór til Berlínar og rak inn nefið á æfingu íslenska landsliðsins. Nokkrum myndum var smellt af og birtast þær skástu hér fyrir neðan.
Smellið á myndirnar til þess að sjá þær stærri.
