„Við náðum aldrei að ógna þeim, byrjuðum illa og vorum í eltingaleik allan leikinn,“ sagði Sólveig Lára Kjærnested þjálfari kvennaliðs ÍR eftir að lið hennar tapaði fyrir ÍBV, 22:18, í síðari viðureign liðanna í úrslitakeppni Olísdeildar í Skógarseli í kvöld. Með sigrinum féll ÍR úr leik en ÍBV heldur áfram keppni í undanúrslitum.
„Við vorum ólíkar sjálfum okkur í fyrri hálfleik, því miður. Það sama var upp á teningnum í leiknum í Eyjum. Okkur tókst aldrei að ná upp þeirri ákefð í leik okkar sem við viljum ná upp,“ sagði Sólveig Lára ennfremur í samtali við handbolta.is.
Sólveig Lára segir ennfremur að ÍR-liðið, sem var nýliði í Olísdeildinni í vetur, hafi sýnt það fyrr á leiktíðinni að það geti haft í fullu tré við ÍBV. ÍBV-liðið er á uppleið um þessar mundir að mati Sólveigar, ekki síst við varnarleikinn. Á sama tíma hafi ÍR-ingar ekki náð sínu besta fram og sennilega leikið sína verstu hálfleika í fyrri hluta tveggja síðustu viðureigna.
Lengra viðtal er við Sólveigu Láru á myndskeiðinu hér fyrir ofan. Þar kemur hún m.a. inn hversu mörg framfaraskref ÍR-liðið hafi tekið á undanförnu ári auk þess sem félagið hafi einnig eflt sitt starf á sama tíma.
Sjá einnig:
ÍR-ingar heltust úr lestinni – ÍBV mætir ValOlís kvenna: Úrslitakeppni, leikjadagskrá
