Rautt spjald og blátt fóru á loft á Torfnesi í gærkvöld þegar Hörður og Þór mættust í fyrsta sinn í undanúrslitum umspils Olísdeildar karla. Eftir liðlega 13 mínútna leik var Endijs Kusners, leikmaður Harðar, rekinn af leikvelli fyrir að gefa Aroni Hólm Kristjánssyni olnbogaskot. Atvikið má sjá hér fyrir neðan.
Ómar Örn Jónsson og Bóas Börkur Bóasson hikuðu ekki við enda var Ómar Örn í mjög góðri aðstöðu til að sjá brotið og lyfti umsvifalaust rauðu spjaldi og bláu í kjölfarið.
Ljóst er að brotið mun koma inn á borð aganefnda HSÍ fyrr en síðan en nefndin fundar ótt og títt meðan á úrslitakeppninni stendur.
Hörður vann leikinn, 28:25, og tók þar með forystu í einvíginu. Næsti leikur verður í Höllinni á Akureyri á föstudaginn og hefst klukkan 19.30.
