„Þegar maður vinnur stórt í fyrsta leik í úrslitakeppni þá verður næsti leikur oft erfiðari. En þetta tókst hjá okkur,” sagði Stefán Arnarson annar þjálfara kvennaliðs Hauka eftir að liðið vann Stjörnuna, 25:21, í annarri umferð úrslitakeppni Olísdeildar kvenna í handknattleik í Hekluhöllinni í Garðabæ. Haukar eru þar með komnir í undanúrslit.
„Við erum í betra standi en Stjarnan og eru með meiri breidd í leikmannahópnum auk þess sem við hlupum betur. Ég held að það hafi aðallega skipt máli. Auk þess var vörnin góð allan leikinn og einnig markvarslan. Það skóp sigurinn,” sagði Stefán spurður hvað hafi orðið til þess að leiðir liðanna skildu á síðasta stundarfjórðungnum.
„Sóknarleikurinn í fyrri hálfleik var eins og fundur hjá bankasýslunni. Okkur tókst að laga það í síðari hálfleik. Menn voru ekki að fela sig á bak við hurðir,” sagði Stefán léttur að vanda en hans bíður að mæta Fram í undan úrslitum en Stefán hætti þjálfun hjá Fram fyrir ári eftir mörg ár við stjórnvölin.
Nánar er rætt við Stefán í myndskeiðinu hér fyrir ofan.
Sjá einnig: Olís kvenna: Úrslitakeppni, leikjadagskrá
