Heims- og Evrópumeistarar Noregs í handknattleik kvenna unnu landslið Svartfjallalands með níu marka mun í fyrri vináttuleik liðanna, 34:25. Leikurinn fór fram í Ørsathallen á Vestlandinu í gær. Síðari viðureignin verður í nýju keppnishöllinni í Volda á morgun.
Eins og stundum áður þá var norska landsliðið, sem Þórir Hergeirsson stýrir, sterkara í síðari hálfleik. Svartfellingar voru mark yfir í hálfleik, 13:12.
Live Rushfeldt Deila sem var í norska B-landsliðinu sem mætti íslenska landsliðinu hér á landi fyrir um mánuði lék sinn fyrsta leik með A-landsliðinu gær. Hún skoraði fimm mörk.
Tvíburasystir hennar Thale Rushfeldt Deila hefur einnig leikið með norska landsliðinu en var ekki með að þessu sinni.
Kari Brattset Dale lék með norska landsliðinu í fyrsta sinn eftir að hafa eignast barn í byrjun nóvember á síðasta ári. Dale er komin á fulla ferð aftur og lék í fyrsta sinn á tímabilinu með ungverska liðinu Györ fyrir rúmum hálfum mánuði.
Nora Mørk skoraði sjö mörk fyrir norska landsliðið og var markahæst. Henny Reistad skoraði fjögur mörk. Nina Bulatovic og Jelena Despotovic skoruðu fimm mörk hvor fyrir svartfellska landsliðið og voru markahæstar.
