„Mér fannst við alls ekki nógu góðir í leiknum þrátt fyrir ágæta byrjun. En svo fannst mér við detta alltof mikið niður,“ sagði Snorri Steinn Guðjónsson þjálfari karlaliðs Vals eftir tveggja marka tap á heimavelli fyrir bikarmeisturum ÍBV í Meistarakeppni HSÍ í Origo-höllinni í kvöld.
„Þegar við duttum niður þá gerðum við alltof mikið af einföldum mistökum. Því miður leit þetta ekki nógu vel út hjá okkur. Hinsvegar gerði ÍBV-liðið vel. Þeir héldu við því forskoti sem þeir náðu í fyrri hálfleik. Við fengum tækifæri til þess að komast í jafnari leik en þá varð óðagot og agaleysi í mörgum skotum okkur að falli. Betra liðið vann að þessu sinni,“ sagði Snorri Steinn sem vildi ekki nota það sem afsökun að langt væri um liðið síðan lið hans lék alvöru keppnisleik.
