Þangað til í kvöld hafði franska karlalandsliðið í handknattleik ekki tapað tveimur leikjum í röð á Óympíuleikunum síðan í Atlanta 1996. Þessi staðreynd er rifjuð upp eftir fimm marka tap franska landsliðsins fyrir Noregi, 27:22, í kvöld. Tap sem kemur í kjölfar þess að franska landsliðið, sem er Evrópu- og Ólympíumeistari, beið lægri hlut fyrir danska landsliðinu á laugardaginn.
Frakkar virtust aldrei eiga möguleika gegn skipulögðu og öguðu norsku landsliði í kvöld. Sóknarleikurinn var fínn, ekki síst í fyrir hálfleik. Varnarleikurinn afar öflugur og Kristian Sæverås markvörður, lærisveinn Rúnars Sigtryggssonar hjá Leipzig, var vel á verði.
Franska liðið var einhvernveginn ekki með á nótunum að þessu sinni. Að Dika Mem undaskildum, sem skoraði 10 mörk í 12 skotum, voru aðrir leikmenn franska landsliðsins fjarri sínu besta.
Norðmenn mæta Ungverjum á miðvikudaginn. Frakkar eiga hinsvegar fyrir höndum leik við Afríkumeistara Egypta.
Mörk Frakklands: Dika Mem 10, Ludovig Fabregas 3, Hugo Descat 2/1, Elohim Prandi 2, Yanis Lenne 2, Nedim Remili 1, Luka Karabatic 1, Dylan Nahi 1.
Varin skot: Vincent Gerard 10, 27%.
Mörk Noregs: Alexandre Blonz 7/4, Simen Ulstad Lyse 5, Tobias Grøndal 5, Harald Reiknkind 3, Kristian Bjørnsen 3, Sander Sagosen 2, Petter Øverby 1, Magnus Gullerud 1.
Varin skot: Kristian Sæverås 11/2, 34%.
Leikjadagskrá og úrslit.
