Þórir Hergeirsson landsliðsþjálfari Noregs í handknattleik kvenna segir niðurröðun leikjanna í átta liða úrslitum handknattleikskeppni Ólympíuleikanna í kvennaflokki vera með miklum ólíkindum. Fyrir vikið sé mjög ólíkur hvíldartími sem liðin fá á milli leikja átta liða úrslita og undanúrslita. Það er að mati Þóris ósanngjarnt.
Noregur og Brasilía eigast við seint annað kvöld í átta liða úrslitum, klukkan 19.30 að íslenskum tíma, 21.30 í Frakklandi. Þá verða liðnir 12 tíma frá því að Danmörk og Holland hófu viðureign sína en sigurliðin úr þessum tveimur rimmum mætast í undanúrslitum á föstudaginn. Danir og Hollendingar hefja leik klukkan 7.30 að íslenskum tíma í fyrramálið, 9.30 að staðartíma.
Eftir að viðureign Danmerkur og Hollands lýkur taka við viðureign Frakklands og Þýskalands annars vegar og Ungverjalands og Svíþjóðar hinsvegar en sigurliðin þar eigast við í hinni rimmu undanúrslita.
Furðar sig á skipulaginu
Þórir furðar sig á að ekki sé hægt að raða leikjunum þannig niður að liðin fái jafnari tíma og undirbúnings á milli leikjanna. Til dæmis með því að Noregur/Brasilía og Danmörk/Holland fari fram fyrri hluta dags og hinar tvær viðureigninar síðar um daginn. Liðin sem komast áfram í undanúrslit úr fyrri viðureign átta liða úrslita eigi síðan fyrri viðureign í undanúrslitum á föstudaginn.
Engin viðbrögð
„Við höfum óskað eftir skýringum hvernig á þessu stendur en ekki fengið svar, enn sem komið er,“ segir Þórir við Verdens Gang. Leikjadagskráin er á ábyrgð Alþjóða handknattleikssambandsins.
Norska landsliðið kom til Lille í gær þar sem endasprettur handknattleikskeppni Ólympíuleikanna fer fram.
Sjá einnig: ÓL: Farið til Lille – leikir átta liða úrslita og tímasetningar
