Ólafur Andrés Guðmundsson, fyrrverandi landsliðsmaður, hefur ekkert getað leikið með HF Karlskrona í sænsku úrvalsdeildinni í handknattleik á yfirstandandi tímabili vegna hvimleiðra meiðsla. Ólafur Andrés er að glíma við brjósklos í baki.
Hann hefur lítið getað æft á tímabilinu vegna brjósklossins og ávallt þegar Ólafur Andrés hefur gert tilraun til endurkomu hefur komið upp bakslag í bata hans.
Ekki er á dagskránni að leggja skóna á hilluna og vonast Ólafur Andrés, sem er 35 ára gamall, til þess að snúa aftur á völlinn með vorinu. Samningur hans við HF Karlskrona rennur út í sumar.
HF Karlskrona er komið í undanúrslit í sænsku bikarkeppninni og er í harðri baráttu um að hafna í einu af efstu átta sætum úrvalsdeildarinnar, sem gefa sæti í úrslitakeppninni í vor.
