HF Karlskrona jafnaði metin í rimmunni við IK Sävehof í átta liða úrslitum sænsku úrvalsdeildarinnar í handknattleik karla í gærkvöld. HF Karlskrona vann með sex marka mun í Partille, 36:30. Næsta viðureign liðanna fer fram í Karlskrona á mánudaginn. Vinna þarf þjár viðureignir til þess að komast í undanúrslit. Fjórða viðureignin fer fram á fimmtudaginn.
Ólafur Andrés Guðmundsson skoraði sex mörk fyrir Karlskrona í leiknum. Dagur Sverrir Kristjánsson náði ekki að skora. Phil Döhler stóð í marki Karlskrona. Því miður hefur reynst þrautin þyngri að afla upplýsinga um hversu mörg skot Döhler varði.
Tryggvi Þórisson skoraði ekki mark fyrir IK Sävehof sem er meistari frá síðasta ári.
Einar Bragi Aðalsteinsson og félagar í IFK Kristianstad mæta Hammarby öðru sinni í átta liða úrslitum í Stokkhólmi í kvöld. Hammarby vann fyrstu viðureign liðanna.
