- Auglýsing -
Handknattleikslið KA hefur orðið fyrir tímabundinni blóðtöku. Samkvæmt heimildum handbolta.is er Ólafur Gústafsson á leiðinni í aðgerð á ökkla vegna meiðsla sem hann hrjá. Af þeim sökum er hugsanlegt að hann verði fjarverandi í allt að þrjá mánuði. Ef það gengur eftir er ljóst að verulega verður farið að halla á árið þegar Ólafur mætir á ný í slaginn inni á leikvellinum með KA-liðinu.
Ólafur gekk til liðs við KA sumarið 2020 og hefur síðan verið einn traustasti og besti leikmaður liðsins, jafnt í vörn sem sókn. Einnig er hann þrautreyndur handknattleiksmaður eftir að hafa leikið með félagsliðum hér á landi, í Danmörku og í Þýskalandi til viðbótar við að hafa leikið með íslenska landsliðinu á stórmótum.
Fyrsti leikur KA í Olísdeildinni er ráðgerður gegn Haukum á Ásvöllum föstudaginn 9. september. Einnig stendur fyrir dyrum hjá KA-mönnum að taka þátt í Evrópubikarkeppninni. Liðið kemur inn í aðra umferð sem leikin verður í lok október og í byrjun nóvember.
- Auglýsing -
