- Auglýsing -
- Vilde Mortensen Ingstad línukona norska landsliðsins í handknattleik meiddist á vinstra hné fimm mínútum fyrir lok viðureignar Noregs og Þýskalands í síðustu umferð riðlakeppni Ólympíuleikanna. Óttast var í gærkvöld að meiðslin séu alvarleg og að Ingstad taki ekki meira þátt í leikunum. Jafnvel var velt vöngum yfir því í norskum fjölmiðlum í gærkvöld að krossband hafi slitnað.
Uppfært: Staðfest var í morgun að Ingstad tekur ekki þátt í fleiri leikjum á ÓL. - Þýska liðið þótti leika fast gegn Noregi í gær og var Þórir Hergeirsson landsliðsþjálfari Noregs óánægður í samtali við TV2 með að bosnískir dómarar leiksins hafi ekki tekið fastar á þýska liðinu.
- Sænski landsliðsmaðurinn Felix Claar er ekki bjartsýnn á að leika meira með sænska landsliðinu á Ólympíuleikunum. Hann meiddist á hæl í þriðja leik landsliðsins og var ekki með í leiknum við Króata í fyrradag og tekur ekki þátt í leiknum við Japan í lokaumferð riðlakeppninnar í dag. Claar er þriðji leikmaður þýsku meistaranna Magdeburg sem meiðist illa á Ólympíuleikunum. Hinir eru hornamennirnir Daniel Pettersson og Tim Hornke.
- Bence Imre, Kristof Palasics og Zoltan Szita koma inn í ungverska hópinn í dag fyrir leikinn við Frakka. Miklos Rosta, Egon Hanusz og Laszlo Bartucz falla úr hópnum í staðinn. Ungverjar verða að vinna leikinn til þess að komast í átta liða úrslit. Þeir eru í fimmta sæti í B-riðli, stigi á eftir Frökkum sem nægir jafntefli til að ná sæti í átta liða úrslitum.
- Luca Witzke verður ekki með þýska landsliðinu í dag gegn Slóvenum. Hann er meiddur. Jannik Kohlbacher tekur sæti Witzke í 14 manna hópnum.
- Egyptinn Mohab Abdelhak sem fékk slæma byltu í leik Egyptalands og Noregs í fyrradag leikur ekki með landsliðinu í dag gegn Argentínu. Akram Yousri hleypur í skarðið fyrir Abdelhak sem fékk þungt högg á bakið í leiknum við Noreg og var borinn þjáður af leikvelli.
- Diego Simonet kemur á ný inn í lið Argentínu í dag fyrir leikinn við Egypta eftir tveggja leikja fjarveru vegna meiðsla. Simonet hefur verið kjölfesta argentínska liðsins árum saman.
- Matej Gaber og Klemen Ferlin leika ekki með Slóvenum í dag gegn Þýskalandi. Þeir glíma við meiðsli. Ferlin hefur átt afar góða leiki í marki Slóvena í leikjum Ólympíuleikanna. Kristjan Horzen og Urh Kastelic koma í stað Gaber og Ferlin.
- Auglýsing -
