Ísland vann öruggan sigur á landsliði Slóveníu, 29:24, í fyrsta leiknum á Sparkassen Cup-handknattleiksmóti pilta í Merzig í Þýskalandi í dag. Íslenska liðið var þremur mörkum yfir í hálfleik, 16:13. Leiknir voru tveir 25 mínútna hálfleikar.
Framan af viðureigninni í dag var nánast jafnt á öllum tölum og liðin skiptust á um að vera marki yfir. Íslenska liðið skoraði þrjú síðustu mörkin í fyrri hálfleik og tvö fyrstu í síðari hálfleik og náði fimm marka forskoti, 18:13. Slóvenar áttu fá svör eftir það. Ísland náði mest átta marka forskoti, 22:14, þegar 14 mínútur voru til leiksloka.
Næsti leikur íslenska liðsins verður gegn austurríska landsliðinu klukkan 10.20 á morgun. Upp úr klukkan 14 á morgun tekur við síðasti leikur riðlakeppninnar gegn hollenska landsliðinu. Austurríki og Holland mætast síðar í dag.
Mörk Íslands: Alex Unnar Hallgrímsson 6, Brynjar Narfi Arndal 4, Ómar Darri Sigurgeirsson 4, Bjarki Snorrason 3, Matthías Dagur Þorsteinsson 3, Anton Frans Sigurðsson 3/2, Örn Kolur Kjartansson 2, Freyr Aronsson 1, Kári Steinn Guðmundsson 1, Patrekur Smári Arnarsson 1, Ragnar Hilmarsson 1.
Varin skot: Anton Máni Francisco Heldersson 8, 40% – Sigurmundur Gísli Unnarsson 2, 15%.
Allir leikir mótsins eru sýndir í beinni útsendingu gegn gjaldi: https://handball-globe.tv/sparkassencup-merzig
