„Frammistaðan var ótrúlega flott en var því miður ekki nóg. Við ætluðum okkur sigur í leiknum. Úr því að við vorum svo nálægt því þá er maður ótrúlega tapsár núna,“ sagði Perla Ruth Albertsdóttir sem var markahæst í íslenska landsliðinu með átta mörk í naumu tapi, 27:25, fyrir hollenska landsliðinu í upphafsleiknum á Evrópumótinu í handknattleik í Innsbruck í kvöld.
Jákvætt skref
„Það er sennilega jákvætt skref á okkar leið að vera hundfúlar eftir tveggja marka tap fyrir Hollandi. Fyrri hálfleikur var frábær en síðari hálfleikur var kaflaskiptur og því miður vorum við með aðeins of marga tapaða bolta. Þegar munurinn var ekki meiri en tvö mörk í lokin þá eru hver mistök dýr. Naumt tap og hundfúllt,“ sagði Perla Ruth ennfremur og bætti við að margt væri hægt að taka úr þessum leik inn í framhaldið á mótinu, gegn Úkraínu á sunnudaginn og Þýskalandi á þriðjudaginn.
Leið eins og við værum að vinna
„Það var margt jákvætt í leik okkar á móti einu besta liði heims og mjög reynslumikið. Ekki eru mörg ár síðan við töpuðum stórt fyrir hollenska landsliðinu. Í dag leið mér meirihluta leiksins eins og við værum að vinna. Við tökum allt það góða úr leiknum og vinnum Úkraínu á sunnudaginn. Við sjáum það með þessum leik að möguleikinn er sannarlega fyrir hendi,“ sagði Perla Ruth Albertsdóttir landsliðskona í handknattleik í samtali við handbolta.is í Innsbruck í Austurríki.
Tveggja marka tap – besti leikur kvennalandsliðsins frá upphafi – áfram veginn
EM kvenna ”24 – leikjadagskrá, riðlakeppni
A-landslið kvenna – fréttasíða.
