Ótrúlegt hvað þeir ala stöðugt af sér frábæra leikmenn

Heiner Brand, fyrrverandi leikmaður og þjálfari þýska karlalandsliðsins, bindur miklar vonir við þýska liðið á komandi Evrópumóti. Hann gerir sér þó fulla grein fyrir að danska landsliðið sé það sem allir vilja vinna. Danir hafa unnið heimsmeistaratitilinn fjórum sinnum í röð en ekki orðið Evrópumeistarar frá 2012.

„Danir voru skrefi framar öðrum á Ólympíuleikunum 2024 og einnig á HM fyrir ári. Það er ótrúlegt hvað þeir ala stöðugt af sér framúrskarandi leikmenn,“ segir Brand í viðtali við þýska handboltamiðilinn handball-world.

Brand er aðeins annar tveggja landsliðsþjálfara sem hefur orðið heimsmeistari sem leikmaður og landsliðsþjálfari. Hinn er Frakkinn Didier Dinart.

EM2026 – fréttasíða.