Óvissa ríkir hjá Ólafi Bjarka

Handknattleiksmaðurinn Ólafur Bjarki Ragnarsson segir óvíst hvað hann geri á næsta keppnistímabili. Hann hefur ekkert leikið með Stjörnunni síðan í mars vegna brjóskloss. Eftir því sem handbolti.is veit best er samningur hans við Stjörnuna að renna út. Ólafur Bjarki sagði við handbolta.is í gær að um þessar mundir einbeitti hann sér að endurhæfingu.

„Núna er ég í endurhæfingu og skoða stöðuna varðandi framhaldið seinna í sumar. Ef ég verð áfram í handbolta þá myndi ég vilja vera áfram hjá Stjörnunni,“ sagði Ólafur Bjarki sem flutti heim fyrir tveimur árum eftir að hafa leikið með félagsliðum í Þýskalandi og í Austurríki um nokkurra ára skeið. Gekk hann til liðs við Stjörnuna við heimkomuna.