Óvissa ríkir um hversu margir íslenskir stuðningsmenn verða á viðureign Íslands og Sviss á Evrópumótinu í handknattleik karla í Malmö Arena. Talið er víst að þeir verði færri en í viðureigninni við Svía á sunnudagskvöld en þá var talið að um 3.000 Íslendingar hefðu verið bláklæddir í áhorfendastúkunni. Vonir standa til þess að a.m.k. 1.500 Íslendingar verði í Malmö Arena. Þar af er nokkur hópur væntanlegur með flugi til Kaupmannahafnar upp úr hádeginu. Frá Kastrup-flugvelli er skotferð með lest til Malmö Arena.
Fátt um svör
Handbolti.is leitaði upplýsinga hjá HSÍ í morgun hvort víst væri að áætlaður fjöldi Íslendinga yrði í áhorfendastúkunni. HSÍ hafði ekki fengið sendar sölutölur til Íslendinga úr miðasölukerfinu og var þar með fátt um svör.
Leikur Íslands og Sviss hefst klukkan 14.30 að íslenskum tíma, 15.30 að svenskum.
Ísland þarf á sigri að halda til að halda efsta sæti milliriðilsins fyrir síðustu umferðina á morgun. Þá mætir íslenska landsliðið Slóvenum. Slóvenar leika við Króata í dag.
