Elliði Snær Viðarsson lék ekkert í síðari hluta viðureignarinnar við Svía á Evrópumótinu í handknattleik í gær eftir að hann fékk sinardrátt í hægri kálfann. Naut hann m.a. fyrst aðhlynningar frá Andreas Palicka, markverði sænska landsliðsins, sem sýndi á sér allt aðra og mýkri hlið en þegar þeir elduðu saman grátt silfur vegna boltans í leik Íslands og Svíþjóðar á HM í Gautaborg fyrir þremur árum.
Arnar Freyr stóð sig vel
„Ég komst bara ekki aftur í liðið, Arnar Freyr stóð sig svo vel sem var bara frábært,“ svaraði Elliði Snær léttur í bragði spurður um af hverju hann hafi ekki mætt aftur til leiks eftir að hafa jafnað sig.
„Annars var það bara gott að geta dreift álaginu vel á milli manna. Það kemur alltaf maður í manns stað,“ sagði Elliði Snær Viðarsson.
–Smellið á myndirnar til þess að sjá þær stærri.
Klár í slaginn á morgun
Elliði Snær mætir galvaskur til leiks með íslenska landsliðinu gegn Sviss í þriðja og næsta síðasta leik íslenska landsliðsins í milliriðlakeppninni á morgun klukkan 14.30. Sinardrátturinn er sem betur fer fyrir bí.
Frá samskiptum Elliða og Palicka í Gautaborg á a HM fyrir þremur árum.
–Smellið á myndirnar til þess að sjá þær stærri.
