Ragnar Hermannsson er nú þegar hættur þjálfun kvennaliðs Hauka í handknattleik. Þetta kemur fram í tilkynningu frá handknattleiksdeild Hauka í kvöld þar sem fram kemur að Ragnar hafi óskað eftir að láta af störfum af persónulegum ástæðum.
Díana Guðjónsdóttir tekur við þjálfun Hauka út leiktíðina og hefur Halldór Ingólfsson sér til halds og trausts. Díana var aðstoðarþjálfari Hauka með Ragnari og forvera hans, Gunnari Gunnarssyni.
„Í kringum áramótin þá lét Ragnar vita að hann vildi láta gott heita í lok leiktíðar. En eftir að liðið hafi styrkt stöðu sína í deildinni og inn í úrslitakeppnina þá óskaði Ragnar eftir því að fá að hætta strax með liðið. Handknattleiksdeild Hauka varð við þeirri ósk hans,“ segir m.a. í tilkynningu Hauka í kvöld.
Ragnar, sem er þrautreyndur þjálfari, tók við þjálfun Hauka á síðasta sumri eftir að hafa verið fjarri þjálfun meistaraflokka um nokkurra ára skeið.
Haukar sitja í sjötta sæti Olísdeildar kvenna með 12 stig eftir 18 leiki af 21 og eiga sæti í úrslitakeppninni næsta víst.
