Leikbann sem Emilía Ósk Steinarsdóttir, FH, var úrskurðuð í á fundi aganefndar HSÍ í síðustu viku var dregið til baka af aganefnd á þriðjudag. Ástæðan er sú að dómarar leiks FH og Víkings í Grill 66-deild kvenna hafa séð sig um hönd. Telja þeir ákvörðun sína um að sýna Emilíu Ósk rauða spjald hafa verið ranga.
Óskuðu þeir eftir að draga spjaldið til baka. Fellst aganefnd á það. Er málið þar með úr sögunni og leikbannið verður að engu.
Emilía Ósk er þess vegna gjaldgeng með FH-liðinu á morgun þegar liðið fær Fjölni í heimsókn í Kaplakrika í fjórðu umferð Grill 66-deildar kvenna.
Þetta kemur fram í úrskurði aganefndar síðan í gær sem birt var á vef HSÍ í morgun.
Þar kemur ennfremur fram að Ari Sverrir Magnússon leikmaður HK sleppur við leikbann þrátt fyrir útilokun þrátt fyrir útilokun vegna grófs leikbrots í leik FH og HK í Olís deild karla þann 10.10.2023. Dómarar meta að brotið falli undir reglu 8:5 b).
„Með tilvísun til 10. gr. reglugerðar HSÍ um agamál er það niðurstaða aganefndar að ekki skuli aðhafst frekar vegna málsins. Aganefnd vekur þó athygli á stighækkandi áhrifum útlokana vegna slíkra brota, skv. 2. mgr. 11. sömu reglugerðar,“ segir í úrskurði aganefndar sem sjá má hér.
