Róbert Geir Gíslason framkvæmdastjóri Handknattleikssambands Íslands segist reikna með að undanþága verði veitt svo að landsleikirnir við Litháen og Ísrael í undankeppni EM2022 í karlaflokki fari fram. Þeir eru fyrirhugaðir í Laugardalshöll 4. og 7. nóvember. Hann segir að í reglugerð heilbrigðisráðherra vegna sóttvarna komi skýrt fram að heimilt sé að gera undanþágu vegna alþjóðlegra viðburða.
„Landsleikir falla svo sannarlega undir alþjóða viðburði og þess vegna sóttum við um undanþágu fyrir síðustu helgi eins og komið hefur fram. Reglugerðin gildir reyndar til þriðja nóvember en okkar stefna er að æfingar landsliðsins hefjist annan nóvember. Ég hef ekki trú á öðru en að við fáum undanþágu til æfinga þá tvo daga sem til stendur að æfa meðan núverandi reglugerð gildir,“ sagði Róbert.
„Vissulega munum við fylgja ströngustu kröfum um sóttvarnir varðandi æfingarnar og síðan leikina. Bæði íslenska yfirvöld og Handknattleikssamband Evrópu gera mjög strangar kröfur varðandi æfingar og framkvæmd leikja og eins viðvíkjandi hvar og hvernig liðin búa og hvernig þau komast til og frá æfingum og fleira. Liðin munu búa í svokölluðum „búblum“ frá því að þau koma til landsins og þar til þau fara aftur, nánast í einangrun.
Við hjá HSÍ erum alveg undir það búin að fara í einu og öllu eftir því sem okkur ber að gera til þess að fylgja reglum til að æfingar og síðan leikirnir megi fara fram,“ sagði Róbert Geir Gíslason, framkvæmdastjóri Handknattleikssambands Íslands í samtali við handbolta.is.
