„Ég vil með valinu verðlauna Reyni Þór og Fram fyrir frábæra frammistöðu hingað til á keppnistímabilinu. Ég hef lengi fylgst með honum og finnst hann eiga það skilið að koma inn í hópinn hjá okkur. Reynir er framtíðarleikmaður og segja má segja að valið á honum sé fyrsta skref hans inn í framtíðina með landsliðinu,“ sagði Snorri Steinn Guðjónsson landsliðsþjálfari í samtali við handbolta.is um valið á nýliðanum Reynir Þór Stefánssyni í 19 manna hópinn sem tilkynntur var í dag vegna tveggja síðustu leikjanna í undankeppni EM 2026 7. og 11. maí.
Reynir Þór er eini nýliðinn í hópnum en þessi 19 ára gamli leikmaður Fram hefur sannarlega slegið í gegn á undanförnum tveimur tímabilum með uppeldisfélagi sínu. Fyrir vikið hefur Reynir Þór verið undir smásjá erlendra félaga síðustu mánuði, ekki síst eftir framúrskarandi frammistöðu á Evrópumóti 20 ára landsliða í Slóveníu í júlí á síðasta ári.
Snorri Steinn segir að það eigi eftir að koma í ljós hversu stórt hlutverk Reynir Þór fær í leikjunum tveimur sem standa fyrir dyrum en pilturinn sé a.m.k. kominn inn fyrir dyragættina sem sé ævinlega fyrsta skref framtíðar landsliðsmanna.
