Rut Arnfjörð Jónsdóttir fyrirliði íslenska kvennalandsliðsins í handknattleik og ein allra öflugasta og reyndasta handknattleikskona landsins um árabil leikur ekki með íslenska landsliðinu á heimsmeistaramótinu sem fram fer frá lok nóvember og fram í desember. Rut segir frá þeim gleðifregnum á Facebook í dag að hún eigi von á barni í nóvember með sambýlismanni sínum og handknattleiksmanninum Ólafi Gústafssyni.
Þetta verður annað barn Rutar og Ólafs. Fyrir eiga þau fimm ára dreng.
Rut á að baki 115 A-landsleiki og tók m.a. þátt í EM 2010 og 2012 og HM 2011, einu stórmótunum sem kvennalandsliðið hefur tekið þátt í til þessa.
Auk þess að leika ekki með landsliðinu er ljóst að skarð verður fyrir skildi hjá KA/Þór vegna fjarveru Rutar.
Önnur landsliðskonan
Rut er önnur landsliðskonan sem er barnshafandi um þessar mundir og mun ekki taka þátt í heimsmeistaramótinu. Hin er Steinunn Björnsdóttir sem sagði frá því í vor að hún ætti von á öðru barni sínu í vetur.
Frakkar, Slóvenar og Angólar andstæðingar Íslands á HM kvenna
