Portúgalski handknattleiksmaðurinn Daniel Esteves Vieira er farinn frá ÍBV eftir tveggja ára veru. Hann hefur samið við Saran Loiret Handball í Frakklandi til tveggja ára. Handkastið segir frá brottför Vieira.
Viera, sem kom til ÍBV sumarið 2023 þegar Rúnar Kárason færði sig yfir til Fram, var markahæsti leikmaður ÍBV í Olísdeildinni á síðustu leiktíð með 104 mörk í 22 leikjum. Tímabilið á undan var Viera næst markahæsti leikmaður Eyjaliðsins emð 84 mörk.
Saran HB hafnaði í fjórða sæti næst efstu deildar franska handknattleiksins í vor en féll úr keppni í undanúrslitum umspils um sæti í efstu deild. Sélestat og Caen taka sæti í efstu deild í stað Créteil og Ivry.
Vieira er annar erlendi leikmaðurinn sem yfirgefur ÍBV á sumarmánuðum. Nokkuð er síðan tilkynnt var að markvörðurinn Pavel Miskevich kvaddi Eyjar.
