- Auglýsing -
Sænska meistaraliðið Skara HF, sem Aldís Ásta Heimisdóttir og Lena Margrét Valdimarsdóttir leika með, er úr leik í forkeppni Evrópudeildarinnar í handknattleik. Eins marks sigur, 27:26, á heimavelli í dag gegn norska liðinu Molde nægði Skara-liðinu ekki til þess að komast í aðra umferð forkeppninnar.
Molde-liðið vann fyrri viðureignina um síðustu helgi með þriggja marka mun, 27:24. Molde-liðar mæta Larvik í annarri umferð sem fram fer í fyrri hluta nóvembermánaðar.
Aldís Ásta skoraði þrjú mörk í leiknum í dag og Lena Margrét eitt mark. Aldís Ásta átti eina stoðsendingu en Lena Margrét þrjár.
Viðureignirnir við Molde voru þær fyrstu í Evrópukeppni í sögu Skara HF sem óvart varð sænskur meistari í vor í fyrsta skipti.
- Auglýsing -
