HSÍ, Olís og Sýn hafa framlengt samstarf sitt til næstu þriggja ára. Guðmundur B. Ólafsson, formaður HSÍ, Jón Ólafur Halldórsson, forstjóri Olís, og Heiðar Guðjónsson, forstjóri Sýnar, skrifuðu samninga þess efnis í dag.
Samstarf HSÍ, Olís og Sýnar hófst fyrir sumarið 2017 og mun núverandi samningur gilda út tímabilið 2022/2023.
„Ég er afskaplega stoltur af því að við semjum áfram við Sýn og Olís um áframhaldandi samstarf varðandi handboltann. Við erum búnir að vera í samstarfi í nokkur ár sem hefur gengið mjög vel og það hefur verið mikill uppgangur í handboltanum og þeirri umfjöllun sem þar hefur verið með útsendingunum hjá Sýn og með Olís sem bakhjarl. Við eigum fyllilega von á því að svo verði áfram og að við setjum handboltann á hærri skör en verið hefur með þessu samstarfi,“ sagði Guðmundur B. Ólafsson, formaður HSÍ, í fréttatilkynningu frá HSÍ.
Jafnframt voru sýndir nýir bikarar sem Íslandsmeistarar Olís deilda karla og kvenna keppa um í vor. Bikararnir eru gjöf Olís til HSÍ og eru þeir eins fyrir karla- og kvennaflokk.
