- Auglýsing -
- Kristján Örn Kristjánsson, Donni, skoraði sjö mörk og gaf þrjár stoðsendingar þegar Skanderborg gerði jafntefli við TT Holstebro á heimavelli í kvöld í dönsku úrvalsdeildinni í handknattleik. Staðan var jöfn í hálfleik, 15:15.
- Jóhannes Berg Andrason skoraði eitt mark fyrir TTH Holstebro sem Arnór Atlason þjálfar. Skanderborg er í fjórða sæti deildarinnar með 16 stig eftir 13 leiki. Holstebro er stigi á eftir í 5. sæti.
- Tumi Steinn Rúnarsson skoraði fjögur mörk í fimm skotum og gaf sjö stoðsendingar í kvöld þegar Alpla Hard og Bärnbach skildu jöfn, 31:31, í austurrísku 1. deildinni í handknattleik. Tumi Steinn kom mikið við sögu í leiknum, ekki síst á lokakaflanum en hann átti stoðsendingar í þremur síðustu mörkum Alpla Hard. Tryggvi Garðar Jónsson skoraði ekki fyrir Alpla í leiknum. Hannes Jón Jónsson er þjálfari Alpla Hard sem er í öðru til þriðja sæti deildarinnar með 12 stig eftir 10 leikin eins og andstæðingurinn í kvöld, Bärnbach.
- Guðmundur Bragi Ástþórsson og Ísak Gústafsson hafa fengið nýjan samherja en danska úrvalsdeildarliðið TMS Ringsted hefur samið við Egyptan Ahmed Sameh. Hann kemur frá Zamalek SC sem er annað af tveimur öflugum liðum í Egyptalandi. Sameh er ætlað að hressa upp á lið TMS Ringsted sem er á meðal neðstu liða dönsku úrvalsdeildarinnar.
- Elvar Ásgeirsson skoraði tvö mörk og gaf fjórar stoðsendingar þegar Ribe-Esbjerg tapaði á heimavelli fyrir HØJ, 31:27, í dönsku úrvalsdeildinni í handknattleik karla í gærkvöld. Leikurinn var sá fyrsti í 13. umferð.
- HØJ náði yfirhöndinni í fyrri hálfleik og var með fimm marka forskot í hálfleik, 17:12. Elvar og félagar náðu ekki að vinna upp forskotið í síðari hálfleik. Ribe-Esbjerg er í 9. sæti. HØJ-liðið, sem er nýliði í deildinni og stjörnum prýtt, situr í fimmta sæti en liðið hefur sótt í sig veðrið eftir slæma byrjun í haust.
- Hannover-Burgdorf vann Bergischer HC, 34:30, í þýsku 1. deildinni í handknattleik í gærkvöld og er þar með komið upp undir miðja deildina með 11 stig eftir 13 leiki. Heiðmar Felixson er sem fyrr aðstoðarþjálfari Hannover-Burgdorf.
- Bergischer, sem Arnór Þór Gunnarsson þjálfar við annan mann, er í næst neðsta sæti með fimm stig. Stuttgart lagði Minden, 35:26, í fyrrakvöld og lyftist upp úr næst neðsta sæti og upp í það fjórða neðsta með sex stig.
- Auglýsing -
