Handknattleiksþjálfarinn Carlos Martin Santos, sem hætti á dögunum þjálfun karlaliðs Harðar á Ísafirði, hefur átt í viðræðum við forráðamenn handknattleiksdeildar Selfoss. Þetta hefur handbolti.is samkvæmt heimildum.
Samkvæmt heimildum handbolta.is eru verulegar líkur á að Santos komi inn í þjálfarateymi karlaliðs félagsins sem leikur í Olísdeildinni á næstu leiktíð eins og undanfarin ár.
Gert er ráð fyrir að Santos verði hægri hönd Þóris Ólafssonar þjálfara karlaliðs Selfoss sem tók við þjálfun liðsins fyrir ári og náði athyglisverðum árangri á síðustu leiktíð á fyrsta starfsári sem þjálfari í meistaraflokki.
Santos var í fjögur ár hjá Herði og fór með liðið upp í Olísdeildina vorið 2022. Hann var í viðræðum við ÍBV fyrr í sumar en eftir að forráðamenn Harðar settu fram ósk um greiðslu upp á hálfa fjórðu milljón fyrir að leysa Santos frá störfum kipptu Eyjamenn að sér höndunum.
Santos var síðar leystur frá störfum hjá Herði. Ungverjinn Endre Koi var í vikunni ráðinn eftirmaður Santosar hjá Herði.
