Þýska 1. deildarliðið SC DHfK Leipzig staðfesti í morgun að handknattleiksmaðurinn Andri Rúnarsson hafi skrifað undir samning við félagið. Handbolti.is sagði frá vistaskiptunum í gærkvöld eftir að fregnir af komu Andra Más til Leipzig-liðsins höfðu spurst út í Þýskalandi.
Andri Már þekkir vel til hjá Leipzig og í þýskum handknattleik. Hann var í nokkur ár á unglingsárum í akademíu félagsins. Auk þess var Andri Már hjá Stuttgart, leiktíðina 2021 til 2022, en gekk til liðs við Hauka í september á síðasta ári. Lék hann um helming leikja Stuttgart umrætt keppnistímabil.
Andri Már lék stórt hlutverk hjá Haukum í úrslitakeppninni í vor og var einn burðarása U21 árs landsliðs Íslands sem vann bronsverðlaun á heimsmeistaramótinu sem lauk í upphafi þessa mánaðar.
Rúnar Sigtryggsson, faðir Andra Más, tók við þjálfun SC DHfK Leipzig nóvember á síðasta ári. Viggó Kristjánsson landsliðsmaður gekk til liðs við SC DHfK Leipzig fyrir ári.
Karlar – helstu félagaskipti 2023
