Róbert Geir Gíslason framkvæmdastjóri Handknattleikssambands Íslands staðfesti í samtali við handbolta.is að í dag hafi kæra borist til dómstóls HSÍ frá handknattleiksdeild Selfoss vegna framkvæmdar á leik ungmennaliðs Stjörnunnar og Selfoss í Grill66-deild kvenna sem fram fór í TM-höllinni í gær.
Eins og fram kom á handbolta.is fyrr í dag fer tvennum sögum af úrslitum leiksins. Í leikslok var staðan 29:29 á markatöflunni en á leikskýrslu er Stjörnunni skráður sigur, 30:29, samkvæmt mótakerfi HSÍ.
Róbert segir að strax eftir leikinn í gær hafi komið fram athugasemd um að eitt mark væri vanskráð á Stjörnuna. Dómarar leiksins hafi þar af leiðandi ákveðið að fara yfir upptöku af leiknum áður en þeir skrifuðu undir leikskýrsluna. Þegar þeir fóru yfir upptökuna kom í ljós að athugasemdin átti við rök að styðjast. Sautjánda mark Stjörnunnar, sem skorað var úr vítakasti, var ekki skráð. Þar af leiðandi hafi Stjarnan skorað 30 mörk í leiknum en Selfoss 29.
„Nú er það dómstólsins að kveða upp úr um hvort úrslitin 29:29 eða 30:29 standi eða að leikurinn fari fram á nýjan leik,“ sagði Róbert Geir Gíslason, framkvæmdastjóri HSÍ, í samtali við handbolta.is.
