Athygli hefur vakið að engar auglýsingar eru á búningum Íslands- og bikarmeistara Fram í upphafi keppnistímabilsins en það mun standa til bóta. Rúnar Kárason starfsmaður Fram og leikmaður karlaliðs félagsins sagði við handbolta.is í gær að sending með keppnisbúningum hafi tafist. Sé það ástæða þess að Fram hefur leikið í búningum með lágmarksmerkingum til þessa, gegn FH í gær og á móti Stjörnunni í meistarakeppninni. Aðeins er keppnisnúmer á baki, á brjósti og á buxum auk félagsmerkis.
Rúnar sagði að nýir búningar væru að koma inn um dyrnar í Lambhagahöllinni og að Fram-liðin verði í fullmerktum búningum í næstu leikjum í Olísdeildum karla og kvenna.
Næsti leikur karlaliðs Fram verður gegn Þór í Lambhagahöllinni á laugardaginn eftir rúma viku. Kvennalið Fram sækir ÍBV heim í fyrstu umferð Olísdeildar kvenna á morgun, laugardag.
Sala auglýsinga á keppnisbúningum er ein mikilvægasta tekjulind íþróttafélaga eins og hjá fleirum.
Staðan og næstu leikir í Olísdeildum.
