Valur vann öruggan sigur á Stjörnunni, 40:24, í upphafsleik 14. umferðar Olísdeildar kvenna í Hekluhöllinni í Garðabæ í kvöld. Eins og tölurnar gefa til kynna var aldrei vafi á því hvort liðið færi með sigur úr býtum. Staðan í hálfleik var 22:13 Val í vil.
Valur hefur þar með 26 stig eftir leikina 14 í efsta sæti Olísdeildar. Stjarnan er með 10 stig í fimmta sæti, þremur stigum á eftir Selfossi en þremur stigum fyrir ofan ÍR. Selfoss og ÍR eiga leik til góða.
Stjörnunni tókst að halda aðeins í við Val framan af leiknum og eftir um 20 mínútur var ekki nema þriggja marka munur, 12:9. Upp úr því fóru Valskonur að sýna tennurnar, jafnt í vörn sem sókn sem varð til þess að munurinn jókst verulega.
Í síðari hálfleik var skiljanlega aldrei spenna í leiknum. Valur náði mest 19 marka forskoti. Þegar leið nærri leikslokum leystist leikurinn aðeins upp og Ágúst Þór Jóhannsson þjálfari Vals skipti yngri leikmönnum í meira mæli inn á völlinn í stað þeirra leikreyndari.
Þórey Anna Ásgeirsdóttir var frábær í leiknum. Hún skoraði 12 mörk í 12 skotum. Ljóst er að leggja verður að henni að gefa kost á sér í landsliðið á nýjan leik. Útilokað er til lengdar að landsliðið njóti ekki krafta einnar af betri handknattleikskonum landsins.
Embla Steindórsdóttir var allt í öllu hjá Stjörnunni. Hún skoraði átta mörk og skapaði sex marktækifæri. Embla hlýtur að banka dyr landsliðsins áður en langt um líður.
Mörk Stjörnunnar: Embla Steindórsdóttir 8/3, Brynja Katrín Benediktsdóttir 5, Tinna Sigurrós Traustadóttir 5/1, Anna Karen Hansdóttir 4, Anna Lára Davíðsdóttir 1, Vigdís Arna Hjartardóttir 1.
Varin skot: Hrafnhildur Anna Þorleifsdóttir 7, 18,9% – Aki Ueshima 1, 10%.
Mörk Vals: Þórey Anna Ásgeirsdóttir 12/6, Thea Imani Sturludóttir 6, Hildigunnur Einarsdóttir 6, Lovísa Thompson 6, Elín Rósa Magnúsdóttir 3, Ásdís Þóra Ágústsdóttir 3, Sigríður Hauksdóttir 2, Elísa Elíasdóttir 1, Arna Karitas Eiríksdóttir 1.
Varin skot: Hafdís Renötudóttir 14/1, 41,2% – Silja Müller 1/1, 20%.
Staðan og næstu leikir í Olísdeildum.
