Viku eftir komuna til Kaíró barst íslenska landsliðshópnum í morgun loksins síðasta taskan sem eftir varð þegar hópurinn millilenti í Brussel á leiðinni til Kaíró. Tólf töskur urðu eftir í Brussel og komu 11 þeirra eftir mikið ferðalag með millilendingum til Kaíró á fimmtudagskvöld. Voru menn nær því úrkula vonar um að sú tólfta kæmist nokkru sinni á leiðarenda.
Sjúkraþjálfari íslenska liðsins, Andrés Kristjánsson, á töskuna sem saknaði var. Hún nú komin í hendur Andrésar á hóteli liðsins í Kaíró í morgun. Í töskunni var ýmis búnaður sem Andrés þarf til starfa sinna sem vonandi er í lagi eftir ferðlagið auk rakvélar og fleiri persónulegra hluta sem koma í góðar þarfir á ferðalögum.
Íslenska landsliðið mætir Serbum klukkan 16.30 í fyrri viðureign sinni í milliriðlakeppni HM. Með sigri tryggir íslenska liðið sér sæti í átta liða úrslit.
Farangur á flakki – Nú horfir allt til betri vegar
HM19-’25: Ljóst að við þolum ekki marga daga
