Sif Hallgrímsdóttir hefur skrifað undir nýjan samning við KA/Þór og leikur því áfram með liðinu á næstu leiktíð. Sif sem er 18 ára gömul er efnilegur markvörður sem hefur verið viðloðin yngri landslið Íslands og var m.a. í U17 ára landsliðinu á Evrópumótinu í Svartfjallalandi í ágúst á síðasta ári.
Sif hefur leikið með meistaraflokki KA/Þór undanfarin tvö tímabil þar sem hún hefur leikið 36 leiki. Hún hefur staðið vel fyrir sínu en í þessum leikjum er hún samtals með 32,4% markvörslu sem er mjög gott.
„Sif er einn efnilegasti markmaður landsins í dag, við viljum endilega bjóða henni upp á góða aðstöðu hér fyrir norðan og gera úr henni þann öfluga markmann sem við teljum að hún geti orðið,“ segir Stefán Guðnason formaður KA/Þórs og fyrrverandi markvörður KA í tilkynningu.
