Línukonan öfluga, Sigrún Ása Ásgrímsdóttir, leikur ekkert með ÍR á næsta keppnistímabili eftir að hún sleit krossband í hné á æfingu í sumar. Þetta staðfesti Sólveig Lára Kjærnested þjálfari ÍR-liðsins við handbolta.is.
Sigrún Ása var annar fyrirliði ÍR-liðsins á síðasta keppnistímabili, þess fyrsta hjá ÍR í Olísdeildinni, um langt árabil. Sigrún Ása skoraði 46 mörk í 21 leik í Olísdeildinni og vann mörg vítaköst. Hún skrifaði undir nýjan tveggja ára samning við ÍR síðla í maí.
ÍR hafnaði í fimmta sæti í Olísdeildinni á síðustu leiktíð og tókst það sem nýliðum deildarinnar hefur trauðla tekist, að festa sig í sessi í deildinni. Einnig komst ÍR í undanúrslit í Poweradebikarnum.
Farið til Tenerife
Sólveig Lára sagði undirbúning ÍR-liðsins fyrir átökin á næsta keppnistímabili vera hafinn og gangi vel að undanskildum meiðslum Sigrúnar Ásu. Æft verður næstu vikurnar og æfingaleikir leiknir þegar nær dregur Íslandsmótinu. Einnig hefur verið ákveðið að fara í æfingaferð til Tenerife nærri næstu mánaðamótum. M.a. verður leikinn æfingaleikur við nýliða Olísdeildar kvenna, Gróttu, sem einnig verða á eyjunni sólríku á sama tíma og ÍR-ingar.
