- Auglýsing -
Óðinn Þór Ríkharðsson og samherjar í Kadetten Schaffhausen lentu í kröppum dansi í fyrsta úrslitaleiknum við BSV Bern í úrslitum A-deildarinnar í Sviss í dag. Í hnífjöfnum leik náði Kadetten að merja eins marks sigur, 34:33, eftir nokkurn darraðardans á loka mínútunum.
Óðinn Þór var eins og stundum áður markahæstur leikmanna Kadetten. Hann skoraði átta sinnum úr níu skotum. Tvö markanna skoraði hornamaðurinn eldfljóti úr vítaköstum.
Staðan var jöfn í hálfleik, 18:18.
Næsti leikur fer fram í höfuðborginni á fimmtudaginn. Vinna þarf þrjá leiki til þess að vinna meistaratitilinn. Kadetten hefur orðið meistari í síðustu þrjú ár.
- Auglýsing -
