Sigur Selfoss á AEK Aþenu, 27:24, í síðari viðureigninni við AEK Aþenu í 2. umferð Evrópubikarkeppninnar í handknattleik kvenna nægði liðinu ekki til þess að komast í næstu umferð. AEK hafði betur, 32:26, í fyrri leiknum ytra fyrir rúmri viku vann þar með rimmuna samanlagt 56:53.
Selfoss-liðið fagnaði a.m.k. sigri í fyrsta heimaleik sínum í Evrópukeppni í handknattleik en með þátttöku sinni braut liðið blað. Fram til þess hefur karlalið Selfoss eitt tekið þátt í Evrópukeppni.
Leikmenn Selfoss voru nokkra stund að ná áttum í upphafi viðureignarinnar og voru leikmenn AEK fyrri til að skora og gerði m.a. þrjú fyrstu mörkin. Jafnt og þétt vann Selfossliðið sig inn í leikinn og var marki undir þegar gengið var til búningsherbergja eftir 30 mínútna leik, 12:11.
Viðureignin var lengi vel í járnum í síðari hálfleik. Selfoss breytti um varnarleik þegar kom fram í miðjan hálfleikinn. Kom breytingin leikmönnum AEK í opna skjöldu. Selfoss skoraði fimm mörk í röð og komst yfir, 24:21. Lengra komst Selfoss-liðið ekki við þá ætlan sína að auka forskotið og niðurstaðan varð þriggja marka sigur, 27:24.
Mörk Selfoss: Anna Kristín Einarsdóttir 5, Hulda Dís Þrastardóttir 5, Hulda Hörnn Bragadóttir 5, Mia Kristin Syverud 5, Emelía Ósk Aðalsteinsdóttir 3, Harpa Valey Gylfadóttir 2, Ída Bjarklind Magnúsdóttir 1, Sara Dröfn Ríkharðsdóttir 1.
Varin skot: Ágústa Tanja Jóhannsdóttir 6, Sara Xiao Reykdal 2.
