„Sigurinn var nokkuð öruggur þegar upp var staðið en það kom kafli í leiknum þar sem ÍR-liðið náði að minnka muninn í fjögur mörk á kafla þar sem við slökuðum aðeins á í vörninni,“ sagði Þórey Anna Ásgeirsdóttir leikmaður Vals í samtali við handbolta.is eftir sigur Valsara á ÍR, 31:23, í upphafsleik áttundu umferðar Olísdeildar kvenna. Valur var fimm mörkum yfir að loknum fyrri hálfleik, 17:12.
Leikið var í Skógarseli en viðureigninni var flýtt vegna leiks Vals við sænska liðið Kristianstad HK í Evrópubikarkeppninni á laugardaginn.
Sjá einnig: Grófum okkur niður í mjög djúpa holu strax í upphafi
Valur hefur þar með áfram fullt hús stiga í deildinni, sextán, en ÍR er með fjögur stig ásamt Stjörnunni í sjötta til sjöunda sæti.
Slæmur upphafskafli kom ÍR-ingum í koll að þessu sinni gegn ógnarsterku liði Vals. Íslandsmeistararnir skoruðu sex fyrstu mörk leiksins. ÍR komst ekki á blað fyrr en eftir liðlega 10 mínútur. Slík frammistaða gengur ekki gegn Valsliðinu. Þar með má segja að mesta spennan hafi verið úr leiknum.
Fljótt að breytast
Snemma í síðari hálfleik tókst ÍR að minnka muninn í fjögur mörk, 18:14. Tækifæri gafst í kjölfarið til að minnka forskot Vals niður í þrjú mörk. Það gekk ÍR-ingum úr greipum og áður en hendi var veifað var Valur kominn sjö mörkum yfir, 21:14, og ljóst hvert stefndi.
Einn leikur í einu
„Svo lengi sem við spilum góða vörn, fáum markvörslu og keyrum hraðaupphlaup þá virkar það yfirleitt. Við leggjum áherslu á þetta í hverjum leik,“ sagði Þórey Anna og bætti við að Valsliðið velti lítið fyrir sér stöðunni í deildinni. „Við tökum einn leik fyrir í einu og látum þar við sitja,“ sagði Þórey Anna sem skoraði sex mörk og var markahæst hjá Val ásamt Theu Imani Sturludóttur.
Staðan og næstu leikir í Olísdeildum.
Mörk ÍR: Sara Dögg Hjaltadóttir 6/1, Sylvía Sigríður Jónsdóttir 4, Vaka Líf Kristinsdóttir 4, Anna María Aðalsteinsdóttir 2, Karen Tinna Demian 2/1, Dagmar Guðrún Pálsdóttir 2, Katrín Tinna Jensdóttir 1, Guðrún Maryam Rayadh 1, Hanna Karen Ólafsdóttir 1.
Varin skot: Hildur Öder Einarsdóttir 7, 25,9% – Ingunn María Brynjarsdóttir 2, 15,4%.
Mörk Vals: Þórey Anna Ásgeirsdóttir 6/3, Thea Imani Sturludóttir 6, Hildigunnur Einarsdóttir 5, Sigríður Hauksdóttir 5, Elín Rósa Magnúsdóttir 3, Hildur Björnsdóttir 3, Ásrún Inga Arnarsdóttir 1, Arna Karitas Eiríksdóttir 1, Lovísa Thompson 1.
Varin skot: Hafdís Renötudóttir 10/1, 34,5% – Elísabet Millý Elíasardóttir 3/1, 42,9%.
Tölfræði HBStatz.
