Sigurgeir Jónsson, eða Sissi eins og hann er oftast kallaður, hefur skrifað undir samning við handknattleiksdeild Vals. Sissi kemur inn í þjálfarateymið sem aðstoðarþjálfari meistaraflokks kvenna og verður nýjum þjálfara Íslands- og Evrópubikarmeistaranna, Antoni Rúnarssyni, og Hlyni Morthens, markvarðaþjálfara til halds og trausts. Sissi mun einnig þjálfa efnilegan 3. flokk sem varð Íslands-, deildar- og bikarmeistari á þessu tímabili undir hans stjórn.
Sissi er gríðarlega reyndur þjálfari sem hefur meðal annars þjálfað meistaraflokkslið kvenna hjá Stjörnunni og var lengi vel aðstoðarþjálfari meistaraflokks kvenna hjá Fram ásamt því að hafa þjálfað 3. og 4. flokk. Þar að auki hefur hann þjálfað yngri landslið Íslands í kvennaflokkum.
„Við erum ánægð með að Sissi verður áfram að Hlíðarenda,“ segir í tilkynningu frá handknattleiksdeild Vals.
