Þýska handknattleiksliðið SC Magdeburg varð í gærkvöld þýskur meistari í handknattleik. Meðal leikmanna liðsins er Selfyssingurinn Janus Daði Smárason sem nú verður landsmeistari í handknattleik í sjöunda skipti á síðustu 10 árum.
Stefán Arnason handknattleiksþjálfari hjá Aftureldingu bendir á þessa athyglisverðu staðreynd um Janus Daða á samfélagsmiðlinum X í dag. Auk þess undirstrikar Stefán þá staðreynd að í öll sjö skiptin hefur Janus Daði verið í burðarhlutverki í meistaraliðunum.
Janus Daði Smárason að vinna sinn 7. meistaratitil á 10 árum og það í fjórða landinu. Lykilmaður í liðunum í öllum þessum titlum. Þvílíka afrekið! Einn almesti sigurvegari sem við eigum. pic.twitter.com/Z5HW58MdYK
— Stefán Árnason (@StefanArnason) May 31, 2024
Ef tíðindaritari handbolta.is skriplar ekki á skötu eru meistaratitlarnir sjö eftirtaldir:
Haukar 2015, 2016.
Aalborg Håndbold 2017, 2019, 2020.
Kolstad Håndball 2023.
SC Magdeburg 2024.
Eina árið sem Aalborg Håndbold varð ekki danskur meistari meðan Janus Daði lék með liðinu, 2018, vann liðið gullverðlaun í bikarkeppninni.
Áfram í Ungverjalandi?
Janus Daði gengur til liðs við Pick Szeged í Ungverjalandi í sumar. Liðið fékk silfur bæði í deildinni og í bikarnum á nýliðinni leiktíð. Fróðlegt verður að sjá hver árangurinn verður að ári liðnu með Janus Daða í burðarhlutverki.
