Smit hjá Íslendingaliði og leik frestað

Þýska 2. deildarliðið EHV Aue, sem tveir íslenskir handknattleiksmenn leika með, hefur fengið viðureign sinni við Elbflorenz, sem til stóð að færi fram í kvöld, frestað um ótiltekinn tíma. Samkvæmt tilkynningu á heimasíðu EHV Aue hefur einn leikmaður liðsins greinst með kórónuveiruna. Aðrir leikmenn hafa verið skimaðir. Einkenni um veikindi hafa ekki gert vart við sig meðal þeirra. Er vonast til að um einangrað tilfelli sé að ræða.

Arnar Birkir Hálfdánsson og Sveinbjörn Pétursson eru leikmenn Aue sem hefur unnið tvo af fyrstu þremur leikjum sínum í deildinni fram til þessa en tapað einni viðureign.