Danska landsliðskonan Kristina Jørgensen gengur aftur til liðs við franska félagið Metz í sumar eftir tveggja ára dvöl hjá Evrópumeisturum Györi í Ungverjalandi.
Danska sjónvarpsstöðin TV2 greinir frá því að búið sé að ganga frá félagaskiptunum og að Jørgensen hafi skrifað undir þriggja ára samning.
Sigursæl
Hún gekk til liðs við ungverska stórliðið Györ sumarið 2024 eftir að hafa spilað með Metz í tvö ár á undan. Í Frakklandi var Jørgensen einkar sigursæl; vann franska meistaratitilinn tvisvar, frönsku bikarkeppnina tvisvar og komst einu sinni í undanúrslit Meistaradeildar Evrópu.
Jørgensen er 27 ára gömul og leikur í stöðu leikstjórnanda.
Lykilmaður hjá Dönum
Jørgensen er á meðal lykilmanna í danska landsliðinu og hefur í tvígang unnið til silfurverðlauna með liðinu á Evrópumótum, í bæði skiptin eftir töp fyrir norska landsliðinu undir stjórn Þóris Hergeirssonar í úrslitaleikjum, og tvisvar til bronsverðlauna á heimsmeistaramótum.
